నా దేశానికేం...

నా దేశానికేం... చాలాబావుంది !

రాళ్లలాంటి జనం కోట్లు ఉంటేనేం -

రత్నాల్లాంటి నాయకులున్న దేశం

రత్నగర్భగా పేరొందిన దేశం

నా దేశానికేం... చాలాబావుంది !

అన్నమో అని అరిచేవాళ్ళుంటేనేం -

గోడౌన్ల నిండా గోధుమలున్న దేశం

అన్నపూర్ణగా అలరారిన దేశం

నా దేశానికేం... చాలాబావుంది !

దున్నేవాడికి భూమి లేకుంటేనేం -

బడాబడా భూస్వాములున్న దేశం

సమసమాజ పూర్ణ సామ్యవాద దేశం

నా దేశానికేం... చాలాబావుంది !

వేలకోట్ల పన్నులు రద్దు చేస్తేనేం -

నిరుపేదను నిలదీసి

నిజాయితీగా పన్ను వసూలు చేసే దేశం

న్యాయాన్ని నాల్గుపాదాల నడిపే దేశం

నా దేశానికేం... చాలాబావుంది !

నరకానికి దారి ఉంటేనేం -

అరచేతిలో వైకుంఠం చూపే

అధినాయకులు, అధికారులున్న దేశం

నా దేశానికేం... చాలాబావుంది !

నల్లబజారుంది నా దేశంలో

నలుపును తెలుపు చేసే నాణ్యమైన

నల్లదొరలున్నారు నా దేశంలో !

నా దేశానికేం... చాలాబావుంది !!