The photo is the one from my album... It was taken by my dad when we visited the orphans home(shishuvihar)... I got the idea to write this poem when i saw the photo two days back..
భావిభారత పౌరులం -
చాచా నెహ్రూ కిష్టులం !!
గల్లీల్లోన పల్లీలమ్ముతూ
చౌరస్తాల్లో బూట్లు పాలిష్ చేస్తూ
చెత్తకుప్పల్లో చిత్తులేరుతూ
పారబోసే అన్నానికి పరుగులు పెట్టే మేం -
భావిభారత పౌరులం - చాచా నెహ్రూ కిష్టులం !
బార్లలోన బీర్లందిస్తూ
లాడ్జీల్లోన 'బోయ్'గ చేస్తూ
పొగఫ్యాక్టరీల్లో పగలు రాతిరి
బాలకార్మికులమై మగ్గుతూవున్న మేం -
భావిభారత పౌరులం - చాచా నెహ్రూ కిష్టులం !
హొటల్లోన కప్పులు కడుగుతూ
అయ్యగోరిళ్ళల్లో అరవచాకిరీ చేస్తూ
అడ్డాకూలీలుగా అనునిత్యం నగరవీధుల్లో
నడ్డివిరిగేటట్లు పనులకైపడిగాపులు పడి వేచివున్న మేం -
భావిభారత పౌరులం - చాచా నెహ్రూ కిష్టులం !
మతిలేని మన రైల్వేబోగీలు తుడుస్తూ
గతిలేని ప్రతి ప్యాసింజర్ గాడి(ద)కి చేయి చాస్తూ
చదువు 'కొన 'టానికి శతవిధాల పలు -
చాకిర్ల నాశ్రయించే సగటు బ్రతుకుల వారసులం మేం -
భావిభారత పౌరులం - చాచా నెహ్రూ కిష్టులం !